Les mots surlignés font l'objet d'une note
1Monseigneur, prevoyant que à loccasion de ces nouveaulx remumantz,
2on pourra establir quelque garnison en la ville de Valence, ainsi
3que desia nous pensons y avoir esté pourveu des Corsses et par
4ce moyen, les habitans de ladite ville seront chargés (comme il est
5raisonnable) de loger les gens de guerre qui y seront establys.
6Nous vous avons volu suplier très humblement par ceste lettre de
7nous faire tant de faveur et de bien à ceulx qui se meslent pour
8noz affaires de la ferme du sel de les descharger et exempter
9de loger lesdits soldars ny aultres gens de guerre quelz quilz soient
10heu esgard a ce que se meslans des affaires publicques comme ilz
11font soyt pour le maniement des deniers, administrations et
12comptes des greniers à sel que pour avoir en charge et tenir
13les livres de rayson et escriptures de ladite ferme du nombre des
14gens de ceste qualité, sont sire jehan Bernard, administrateur
15pour nous en ladite ferme, sire Jherosme Faure, quayssier et
16ayant charge des deniers, sires Joseph Lechas et Christofle
17Miraullieur noz commis à la vente du sel du grenier de ladite
18ville et jadys recepveurs des deniers imposés pour la soulde
19des gens de guerre, Jacques Fouliouse père et filz
20et Anthoine Morfin, commis au debitement en gros et
21menu dudit sel, sire Jehan Bataillie contrerolleur de
22ladite vente et commis aux deschargementz, et maître Regnaud
23Rousset, lequel à entière charge des papiers, escriptures et
24livres de raison de ladite ferme ; tous lesquelz nous
25vous supplions très humblement, monseigneur, voloir descharger
26de la peyne et ennuy quon peult recepvoir au logis
27[v] desdits soldars qui les pourroyent non seullement destourner
28de la vaccation en quoy ilz sont employer, mais aussy leur pourroit
29causer ou perte de deniers ou esgarement de papiers et
30escriptures qui ne pourroit revenir quau detriment et
31perte du general pour le bien duquel nous avons advisé
32de vous faire ceste Requete de laquelle, Monseigneur, vous
33ne nous esconduyrés sil vous plaict et pour ce bien faict,
34nous et eulx prierons et prions Dieu vous donner
35Monseigneur en très bonne santé longue et très heureuse
36vie, après nous estre très humblement recommandé à voz
37bonnes graces. De Grenoble, ce XVIIe jour doctobre 1572
38Voz humbles et obeissans serviteurs
39les commis des estatz de Daulphiné
40Bourgel